Преподобный Иоанн Рыльский (1238)
Дни памяти – 31 августа, 1 ноября – перенесение мощей
Канон преподобному Иоанну Рыльскому
Минея, 18 Августа.
Глас 1
Песнь 1
Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.
Припев: Преподо́бне о́тче Иоáнне, моли́ Бо́га о на́с.
Да́ждь ми, блаже́нне, кре́пкую с высоты́ по́мощь и просвеще́ние ра́зума,/ я́ко да равноа́нгельное твое́ на земли́ житие́ восхвалю́,/ и́мже исто́чник чуде́с яви́лся еси́.
Припев: Преподо́бне о́тче Иоáнне, моли́ Бо́га о на́с.
И́же в Лива́не ке́дру уподо́бился еси́, доброде́тели боже́ственныя преумно́жив,/ и, я́ко дре́во насади́вся при исхо́дищих воды́ живы́я,/ осеня́еши ны́не неду́жных благода́тию.
Сла́ва Отцу́ и Сы́ну и Свято́му Ду́ху.
Вы́спрь житие́ на́ше я́ко слы́шав и на Небесе́х пребыва́ние,/ оста́вил еси́ зе́млю оте́чества твоего́, и ми́ра кра́сная презре́л еси́,/ и к Вы́шней жи́зни впери́лся еси́.
И ны́не и при́сно и во ве́ки веко́в. Ами́нь.
Богородичен: Егда́ восхожда́ху Небе́снии у́ми ле́ствицу Иа́ковлю и низхожда́ху,/ Твое́ стра́шное тогда́ рождество́ та́йно яви́ша, Богоро́дице,/ и́мже у́бо Бог на зе́млю сни́де, да челове́ки на Не́бо вознесе́т.
Песнь 3
Ирмос: Еди́не, ве́дый челове́ческаго существа́ не́мощь/ и ми́лостивно в не́ вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.
Припев: Преподо́бне о́тче Иоáнне, моли́ Бо́га о на́с.
Не роди́вся от по́хоти плотски́я, я́ко безпло́тен пожи́л еси́ на земли́,/ и ча́до был еси́ Вы́шняго благода́тию,/ и я́ко жре́бий оте́ческий прия́л еси́ угото́ванное Ца́рство Того́ возлю́бльшим.
Припев: Преподо́бне о́тче Иоáнне, моли́ Бо́га о на́с.
Благода́тию Ду́ха исполня́я за́поведь изра́ильтяном Моисе́йскую,/ очи́стил еси́ те́ло и ду́шу де́ньми мно́жайшими,/ на го́ру возше́д, и я́ко безпло́тен пребыва́л еси́ та́мо,/ и боговиде́ния сподо́бился еси́.
Сла́ва Отцу́ и Сы́ну и Свято́му Ду́ху.
От ю́ности украси́вся ра́зумом, Соломо́нову му́дрость стяжа́л еси́/ и, всю ми́ра сего́ сла́стную пи́щу премину́в,/ а́лчбою и боле́знию потща́лся еси́ нетле́нную получи́ти, всеблаже́нне.
И ны́не и при́сно и во ве́ки веко́в. Ами́нь.
Богородичен: Госпо́дь пе́рстом написа́ в Тебе́ Сло́во Безнача́льное,/ я́коже в глави́зне кни́жней, Всепе́тая;/ те́мже припа́даю Ти, моля́ся, в кни́зе живо́тней мя написа́ти,/ грехо́в рукописа́ние растерза́ющи.
Седален, глас 6
По́стническия по́двиги поне́сл еси́ и страда́льческим венце́м увяза́лся еси́,/ с безпло́тными бо враги́ в телеси́ боря́ся и во́инства их низлага́я,/ удиви́л еси́ терпе́нием твои́м А́нгелы,/ и́хже житию́ во пло́ти поревнова́л еси́./ Но моли́ся Христу́ Бо́гу, о́тче Иоа́нне, спасти́ся нам.
Песнь 4
Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.
Припев: Преподо́бне о́тче Иоáнне, моли́ Бо́га о на́с.
Виде́ние Дании́лово разсмотри́в,/ я́ко от горы́ отто́ржеся ка́мень несече́нный и в прах и́дольское сокруши́ мучи́тельство,/ обре́л еси́ на горе́ краеуго́льный Ка́мень, Христа́,/ зло́бу всю сокруша́юща.
Припев: Преподо́бне о́тче Иоáнне, моли́ Бо́га о на́с.
Огне́м да не опа́лится содо́мским,/ А́нгел Ло́тови повелева́ше на горе́ спасти́ся,/ ты же, ра́вное тому́ рве́ние восприи́м и на го́ру возше́д,/ та́мо жи́ти изво́лил еси́ и пла́мене страстна́го избежа́л еси́.
Сла́ва Отцу́ и Сы́ну и Свято́му Ду́ху.
Смире́нно после́довал еси́ жезло́м позва́вшему / и, я́ко овча́ незло́биво, зе́лием Го́рним пита́лся еси́;/ ны́не же на па́жити ра́йстей поко́ище обре́т,/ на вода́х пи́щных насыща́ешися.
И ны́не и при́сно и во ве́ки веко́в. Ами́нь.
Богородичен: Вкуси́ Ада́м печа́ль плода́ дре́вняго, жену́ послу́шав,/ Ты же, Чи́стая, глас Арха́нгела восприи́мши;/ се Раба́ Госпо́дня! возопи́вши и Бо́га поро́ждши,/ ра́дость в мир ввела́ еси́.
Песнь 5
Ирмос: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Припев: Преподо́бне о́тче Иоáнне, моли́ Бо́га о на́с.
Я́коже А́нгел на земли́ пребы́в,/ воздержа́нием Крести́телю уподо́бился еси́, пусты́нному воспита́нию, преподо́бне;/ ны́не же хле́бом а́нгельским пита́яся по пи́санному,/ насы́ти ду́ши на́ша благода́тию.
Припев: Преподо́бне о́тче Иоáнне, моли́ Бо́га о на́с.
Твое́ дерзнове́ние, е́же к Бо́гу, неора́нно прозябы́й слану́ток пропове́дует, о́тче,/ и́мже сама́го себе́ ди́вно пита́л еси́, я́коже естество́м пло́ти обложе́ннаго,/ и и́же к тебе́ приходя́щия.
Сла́ва Отцу́ и Сы́ну и Свято́му Ду́ху.
И́стинная наде́жда не посрами́ тебе́, блаже́нне, уве́девша бу́дущую сла́ву,/ к не́йже недосто́йна вмени́л еси́, я́же на земли́ боре́ния/ и дерзнове́нно к по́стническим страсте́м устреми́лся еси́.
И ны́не и при́сно и во ве́ки веко́в. Ами́нь.
Богородичен: Хи́тростию зми́я Ада́м боже́ственныя ри́зы совлече́ся и в ри́зу ко́жаную оде́яся;/ от Тебе́ же плоть прии́м, Зижди́тель мой дебельства́ пло́ти совлече́ мя/ и в пе́рвую мя па́ки оде́жду оде́я.
Песнь 6
Ирмос: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.
Припев: Преподо́бне о́тче Иоáнне, моли́ Бо́га о на́с.
Све́том пе́рвым облиста́вся, был еси́ свети́льник, блаже́нне, и А́нгелом подо́бник,/ безпреста́нно поя́ в моли́твах всено́щных Еди́наго Бо́га,/ Его́же и сын благода́тию яви́лся еси́.
Припев: Преподо́бне о́тче Иоáнне, моли́ Бо́га о на́с.
Волну́ющееся бу́рею мо́ре жития́ оста́вил еси́,/ погружа́ющее нехотя́щих на Не́бо вознести́ся,/ и вся преше́л еси́ мирски́я прило́ги, наг бе́гая искуше́ний лука́ваго.
Сла́ва Отцу́ и Сы́ну и Свято́му Ду́ху.
Обре́л еси́ Бо́га, все́льшася в тя,/ не дав поко́я скраниа́ма твои́ма, ни ве́ждома твои́ма дрема́ния,/ и, я́ко безпло́тен во пло́ти пожи́в,/ в Небе́сныя хра́мы всели́лся еси́.
И ны́не и при́сно и во ве́ки веко́в. Ами́нь.
Богородичен: Иска́пай ка́пли щедро́т, о́блаче Небе́сный, Чи́стая Де́во,/ я́коже руно́ прии́мшая до́ждь и я́коже ка́плю Бо́га во чре́ве,/ и страсте́й мои́х пото́ки изсуши́.
Кондак, глас 2
В моли́твах бо́дренно не усыпа́я/ и в пе́ниих непреста́нных А́нгелом подо́бяся,/ в гроб вшел еси́, тле́нную жи́знь оста́вив,/ и к Небеси́ преше́л еси́/ на нетле́ние, Иоа́нне о́тче,/ от сме́рти бо к животу́ ве́чному/ тя пресели́ Христо́с Бог, я́ко Своего́ уго́дника.
Икос
И́же па́че естества́ в телеси́ ме́ртвеннем а́нгельскому поревнова́вшаго житию́,/ прииди́те, воспои́м Иоа́нна преблаже́ннаго,/ той бо я́ко о́треби вмени́ мир и я́же в ми́ре,/ и, на го́ру возше́д, я́коже дре́вле вели́кий Моисе́й, посто́м очи́стися,/ и ви́дети сподо́бися Тро́ическую све́тлость не во мра́це, ни во ви́хре, но во све́те благода́ти./ Тем и чуде́с лучи́ облиста́ет,/ и ре́ки исцеле́ний ве́рным источа́ет от гро́ба своего́,/ от сме́рти бо к животу́ ве́чному пресели́ его́ Христо́с Бог, я́ко Своего́ уго́дника.
Песнь 7
Ирмос: Тебе́, у́мную, Богоро́дице, пе́щь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Припев: Преподо́бне о́тче Иоáнне, моли́ Бо́га о на́с.
Хра́брый ревни́тель быв Илии́ проро́ку,/ на стра́сти устреми́лся еси́ ору́жием поста́/ и, на горе́ водворя́яся, а́лчбою па́че челове́к по́стнически умертви́л еси́ сра́мныя по́мыслы.
Припев: Преподо́бне о́тче Иоáнне, моли́ Бо́га о на́с.
Бо́жия пути́ пра́ваго восхоте́в, и мирска́го жела́ния отве́ргся,/ и на ка́мени разу́мнем стопы́ души́ твоея́ утверди́в,/ ка́мене собла́зна при стези́ всех избавля́еши и прило́гов искуше́ний.
Сла́ва Отцу́ и Сы́ну и Свято́му Ду́ху.
О́крест ра́ки моще́й твои́х то́чатся чудеса́ исцеле́ний приходя́щим,/ Бо́гу бо коне́чне угоди́л еси́,/ ве́рующим обеща́вшему ре́ки из чре́ва источи́ти Боже́ственныя благода́ти.
И ны́не и при́сно и во ве́ки веко́в. Ами́нь.
Богородичен: Глубину́ слы́шим прему́дрости, Пречи́стая,/ я́ко Созда́вшаго руко́ю Ада́ма и от ребра́ его́ жену́ Сотво́ршаго Сло́ва воплоти́ла еси́,/ И́же, в ре́бра на Кресте́ пробожде́н, род челове́ческий обнови́.
Песнь 8
Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.
Припев: Преподо́бне о́тче Иоáнне, моли́ Бо́га о на́с.
Иску́с врага́ доблему́дренно отрази́в во бра́ни кре́пцей/ и непобеди́м яви́вся бесо́вскими кова́рствы,/ побе́дными венцы́ увяза́лся еси́/ и, Го́сподеви ны́не предстоя́, мо́лишися о воспева́ющих тя.
Припев: Преподо́бне о́тче Иоáнне, моли́ Бо́га о на́с.
Сме́ртней кончи́не приспе́вшей вре́менней,/ оста́вил еси́ труды́ по́стническия,/ и, ве́чный поко́й восприи́м, Бо́гу предстои́ши,/ и, посреде́ луче́й неизрече́ннаго Божества́ сия́я, о нас мо́лишися.
Благослови́м Отца́ и Сы́на и Свята́го Ду́ха, Го́спода.
Ра́вне дре́внему патриа́рху Иа́кову вар дневны́й поне́с и сту́день нощну́ю претерпе́в,/ возше́л еси́ ле́ствицею доброде́телей на высоту́ боговиде́ния,/ о́тче Иоа́нне, чуде́с исто́чниче.
И ны́не и при́сно и во ве́ки веко́в. Ами́нь.
Богородичен: А́гнице Пречи́стая, к Тебе́ прибега́ю:/ ду́шу мою́, страстьми́ оскверне́нную, вода́ми омы́й сле́зными,/ вода́ми благода́ти Ду́ха Бо́жия глубо́кий кал грех челове́ческих омы́вшая.
Песнь 9
Ирмос: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти мо́лимся пе́щь,/ да Тя, Богоро́дице,/ непреста́нно велича́ем.
Припев: Преподо́бне о́тче Иоáнне, моли́ Бо́га о на́с.
Изя́щныя по́чести по́двига твоего́ восприя́л еси́ терпе́нием твои́м,/ его́же ра́ди со А́нгелы водворя́ешися/ и за наготу́ теле́сную в Небе́сную ри́зу обле́клся еси́, в по́стницех всеизря́дне.
Припев: Преподо́бне о́тче Иоáнне, моли́ Бо́га о на́с.
Любому́дрых собо́рище, ви́ждь,/ каковы́ми благода́тьми воздае́т Бог и́стинно Того́ добро́ты вожделе́вшим:/ ни естество́ бо, ни вре́мя телесе́ Иоа́нна пустыннолю́бнаго победи́,/ точа́щаго чудеса́ да́же доны́не.
Сла́ва Отцу́ и Сы́ну и Свято́му Ду́ху.
Ели́ко си́ла скрижа́ли се́рдца моего́ распросте́р,/ вся написа́х мно́гия твоя́ благода́ти,/ но досто́йна ничесо́же принесо́х тебе́;/ те́мже молю́ тя:/ ве́ру приими́ и любо́вь, преблаже́нне.
И ны́не и при́сно и во ве́ки веко́в. Ами́нь.
Богородичен: Вонми́ Дави́дских гу́слей провеща́нию, Дщи Царе́ва, и приклони́ у́хо Твое́./ Люде́й Твои́х не забу́ди, но уще́дри, Деви́це,/ и́же непреста́нно Тя сла́вящих.
Светилен
Пустынножи́теля вси Иоа́нна ве́рно восхва́лим,/ А́нгела земна́го и челове́ка Небе́снаго,/ чуде́с мно́жество неиждива́емо нам точа́щаго.
Молитва преподобному Иоанну Рыльскому
Земна́я звездо́ чуде́сная, облиста́вшая преде́лы гра́да Сре́дца, преди́вный по́стниче и уго́дниче Бо́жий, о́тче Иоа́нне, преподо́бных ра́дование, Це́ркве Бо́лгарския украше́ние, кре́пкий адама́нте ве́ры Правосла́вныя и живы́й све́щниче, всю зе́млю Бо́лгарскую све́том пра́вды Бо́жия осия́вый! Ты еси́ ско́рый помо́щник с ве́рою и любо́вию к тебе́ притека́ющим и вели́кий предста́тель пред Го́сподем о всех нас. Приими́, преблаже́нне, на́ша моле́ния и умоли́ Христа́ Бо́га на́шего, да вси тобо́ю наставля́емии лю́дие слове́нстии пребыва́ют сою́зом бра́тския любве́ связу́еми, в ми́ре и благоче́стии, и да изба́вит их Госпо́дь и вся гра́ды и страны́ христиа́нския от враг ви́димых и неви́димых и от наше́ствия иноплеме́нник, от неду́га и гла́да и вся́кия ско́рби, наипа́че же от искуше́ний врага́ те́мнаго. Предстоя́щим же зде и моля́щимся пред пречи́стым твои́м о́бразом испроси́, преподо́бне, у Го́спода Бо́га на́шего вся, я́же ко спасе́нию своему́ они́ про́сят, да вси с тобо́ю прославля́ем Всесвято́е И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.
Молитва 2-я преподобному Иоанну Рыльскому
О преподо́бне о́тче Иоа́нне, уго́дниче Госпо́день преизря́дный, те́плый наш засту́пниче и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́ и умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́ во всем житии́ мое́м де́лом, сло́вом, помышле́нием и все́ми мои́ми чу́вствы. И во исхо́де души́ моея́ помози́ ми, окая́нному, и умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́ и Сы́на и Свята́го Ду́ха и твое́ ми́лостивное предста́тельство, и ны́не, и при́сно, и во ве́ки веко́в. Ами́нь.
***
Акафист преподобному Иоанну, Рыльскому чудотворцу и пустынножителю
Кондак 1
Избранный Богом и предивный житием, преподобне Иоанне, от юности Христа возлюбив, путем тесным к Нему шествовал еси; велиих же ради подвигов твоих и слез излияний дарованьми Духа Святаго обогатился еси. Темже яко велие ко Святей Троице дерзновение имуща ублажаем тя, просяще: от всяких нас бед свободи, зовущих: радуйся, преподобне Иоанне, Рыльский чудотворче, славо и радосте наша.
Икос 1
Ангел земный и человек небесный был еси, преподобне Иоанне. Како убо славу твою воспоем достойно, многими немощьми обдержимии? Но сам вложи песнь хвалебную во ycта нас, зовущих:
Радуйся, от родителей благочестивых рожденный; радуйся, ими в страсе Божии добре воспитанный.
Радуйся, из младенства от Церкве николиже отступивый; радуйся, тоя священными ученьми благодатный разум стяжавый.
Радуйся, заповедей Господних блюстителю верный; радуйся, пощений и бдений непрестанных делателю усердный.
Радуйся, по смерти родителей наследие свое убогим раздавый; радуйся, жития ради добраго гонение от человеков лукавых подъявый.
Радуйся, клеветы неправедныя претерпевый; радуйся, досаждения с кротостию понесый.
Радуйся, любовию Серафимскою вслед Христа последовавый; радуйся, ея ради путь узкий иночества избравый.
Радуйся, преподобне Иоанне, Рыльский чудотворче, славо и радосте наша.
Кондак 2
Видя мира сего суету, преподобне Иоанне, невозвратно того отвратитися потщался еси; ничтоже бо тебе от Христа можаше разлучити: ни узы сродства, ни юность твоя, ниже слава мира сего и красота. Сия убо вся ни во чтоже вменив, якоже елень на источники водныя, к Богу востекл еси, вопия Ему: Аллилуиа.
Икос 2
Разуму божественному покорился еси, блаженне, егда Господа в видении соннем узрел еси, от земли твоея изыти повелевающа ти и место спасения твоего показующа, и вся, яже в мире презрев, во обитель Руенскую вселился еси, идеже образ иноческий восприял еси. Сего ради вопием ти таковая:
Радуйся, житие иноческое возлюбивый; радуйся, противу греха воинствовати даже до смерти восхотевый.
Радуйся, купно с власы своими мирская вожделения отложивый; радуйся, с ненасытною жаждею к подвигом иноческим себе устремивый.
Радуйся, в предняя простираяся, задняя забвению предавый; радуйся, сладость жительства уединеннаго в себе обретый.
Радуйся, любве ради божественныя житие пустынное возлюбивый; радуйся, вины ради сея место пострига своего оставивый.
Радуйся, к горе, в видении тебе явленней, пришедый; радуйся, ничтоже имеяй, в колибе хврастней себе вселивый.
Радуйся, дивный пустынножителю; радуйся, Иоанна Крестителя подражателю.
Радуйся, преподобне Иоанне, Рыльский чудотворче, славо и радосте наша.
Кондак 3
Силою Духа Святаго осеняем в пустыни вселился еси, Иоанне, безмолвное житие провождати, с Богом невозбранно беседовати, Того ангельски непрестанно славословити, лучами света Божественнаго озарятися, за вся же люди и мир Спасителю Богу молитися, поя Ему присно: Аллилуиа.
Икос 3
Имея желание огнепальное боговидения Моисейскаго, преподобне, на гору возшел еси явления божественныя славы восприяти, ихже око не виде и ухо не слыша и яже на сердце человеку не взыдоша. И кто возможет изрещи вся подвиги твоя, в безмолвии сотворенныя? Но мы, дивящеся житию твоему, сице взываем ти:
Радуйся, бремя подвиг велиих на рамена своя возложивый; радуйся, житием твоим Ангелов удививый.
Радуйся, яко не хлебом, но былием травным себе питал еси; радуйся, и того бо зело мало по захождении солнца вкушал еси.
Радуйся, жажду водою в меру утолявый; радуйся, купно с пророком «скотен бых у Тебе» Богу вопиявый.
Радуйся, яко потоки слез от очей твоих источал еси; радуйся, молитвы бо твоя непрестанно Богу возсылал еси.
Радуйся, подвиги сими от страстей себе очистивый; радуйся, бесов в зверине образе тебе устрашити тщащихся посрамивый.
Радуйся, адаманте, козньми вражиими несокрушимый; радуйся, во всех искушениих и напастех всегда с Богом бывый.
Радуйся, преподобне Иоанне, Рыльский чудотворче, славо и радосте наша.
Кондак 4
Бурю напастей демонских укротити восхотев, в пещеру некую зело мрачную вселился еси, преподобне Иоанне, порабощая тело твое и лишаяся света солнечнаго, яко да не лишишися Божественнаго Света в Царствии Господа твоего и да поеши Ему тамо со всеми святыми: Аллилуиа.
Икос 4
Слышав о тебе, преподобне, сын брата твоего, Лука отрок, и родителей утаився, к тебе в пустыню приде и тобою наставляем восприя подвиги твоя. Мы же силою благодати твоея ужасаеми, вопием ти сице:
Радуйся, Светом Божественным южика своего озаривый; радуйся, дитя малое пустынна жителя соделавый.
Радуйся, от злобы древния сего ради напасть новую приемый; радуйся, клевету в похищении отрока претерпевый.
Радуйся, от брата своего поругания понесый; радуйся, детище, от тебе отторженное, благословением укрепивый.
Радуйся, молитвою слезною диаволи посрамивый; радуйся, отрока, от змия ужаленнаго, смертию с Господем соединивый.
Радуйся, цвете райский на камени гор Рыльских прозябый; радуйся, от Камене Божественнаго водою живою обильно напоенный.
Радуйся, таинниче Божий, в пустыни не утайвыйся; радуйся, светильниче Христов во мраце пещернем просветивыйся.
Радуйся, преподобне Иоанне, Рыльский чудотворче, славо и радосте наша.
Кондак 5
Боготечней звезде подобни суть святии человецы: не точию бо сами ко Христу шествуют, но и прочиим людем спасения путь указуют. Сего ради вселукавый творит им напасти, якоже и тебе, Иоанне: нападе бо на тя во образе разбойник, иже избивше тя, отгнаша от пещеры первыя. Тогда ты в пустыню Рыльскую глубочае вшед, в дупло дуба великаго вселился еси, во еже большими труды Господа твоего прославляти и пети Ему: Аллилуиа.
Икос 5
Видя Господь толикое озлобление твое, преподобне, повеле земли да израстит слануток тебе в напитание; славна же тя яви пастырем, близ пустыни тоя обретшимся, да и мы купно с видевшими дивная дела твоя вопием тебе таковая:
Радуйся, от демонов велия страдания приемый; радуйся, воине Христов непобедимый.
Радуйся, не до конца от них озлобленный; радуйся, Христа покровом всемогущим покровенный.
Радуйся, пред лицем пастырей от Господа прославленный; радуйся, обретшим тя житие твое неволею известивый.
Радуйся, злаком чудесным тех напитавый; радуйся, отшедших их чудом дивным наставивый.
Радуйся, прочиим людем от них проповеданный; радуйся, от приходивших к тебе дарований Божиих не скрывый.
Радуйся, зело страждуща бесна молитвою слезною исцеливый; радуйся, к совершению чудесе сего всю надежду на Бога возложивый.
Радуйся, преподобне Иоанне, Рыльский чудотворче, славо и радосте наша.
Кондак 6
Проповедницы должни есмы быти смирения твоего, преподобне Иоанне, явленнаго пред исцелением беснаго в молитве твоей сицевой: «Боже милосердный, несмь достоин именовати Твое имя моими нечистыми усты!» Сего ради тщимся убо и мы во смирении молитися Господеви и пети Ему: Аллилуиа.
Икос 6
Возсиявшу ти чудесы велиими, множайшую к тебе веру и любовь возимеша людие православнии. Но славе твоей по всей Болгарстей стране прошедшей, востав изшел еси от дуба, славы человеческия бегая. Темже смирения ради твоего ублажаем тя сице:
Радуйся, смирение божественное возлюбивый; радуйся, славу человеческую возненавидевый.
Радуйся, гласа Христова к смирению призывающа, послушавый; радуйся, словеса Писания еже не нам, но имени Божию славу даяти, присно соблюдавый.
Радуйся, высокая достигнувый и ни киих дел благих в себе не видевый; радуйся, древу плодоносну, ветвьми низу клонящуся, подобен бывый.
Радуйся, смирением Давиду, рекшему «аз есмь червь, а не человек», поревновавый; радуйся, купно с пророком Исаиею «о, окаянный аз» вопиявый.
Радуйся, со апостолом грешника себе перваго нарицавый; радуйся, во смирении своем Самому Господу подражавый.
Радуйся, тщеславию доблественне противоставый; радуйся, сие яко прах земный ногами поправый.
Радуйся, преподобне Иоанне, Рыльский чудотворче, славо и радосте наша.
Кондак 7
Хотящу ти страдания большая подъяти пламенныя ради ко Христу любве твоя, столпнику дивному Симеону уподобился еси, на камень возшед, преподобне Иоанне, во дни и нощи аки бесплотен молитву дея, слезами камень омакая и единому токмо Богу беседовати желая. Мы же на подвиг сей взирающе, прославляем всемогущаго Бога в тебе дивнаго и поем Ему: Аллилуиа.
Икос 7
Новаго подвига твоего, блаженне, не стерпев диавол, поемлет с собою легион бесов, иже с камене тя в пропасть глубокую свергоша. Но ты с трудом велиим востав, паки на камень возшел еси творити молитвы твоя и дивящихся воставляеши звати ти:
Радуйся, ко Христу любовь велию стяжавый; радуйся, сего ради тяжце от полков демонских пострадавый.
Радуйся, страдания сия ни во чтоже вменивый; радуйся, Христа паче жизни твоея возлюбивый.
Радуйся, ни чим же от Христа разлученный; радуйся, Им сего ради возлюбленный.
Радуйся, служения ангельскаго сподобивыйся; радуйся, от руки Ангела хлебом питавыйся.
Радуйся, любовию ко Христу вся диавольская искушения победивый; радуйся, тою вся Христа заповеди соблюдый.
Радуйся, любве ради сея токмо славы Божественныя искавый; радуйся, сего ради от Господа прославленный.
Радуйся, преподобне Иоанне, Рыльский чудотворче, славо и радосте наша.
Кондак 8
Странный образ жития твоего, велие смирение и любовь твоя ко Христу приумножиша в тебе благодать, яже ти в крещении Христовых ради страстей и смерти крестныя даровася. Сего ради сотвори тя Господь солнце духовное Православныя Церкве, да просвещаются тобою чада ея ко спасению и да вопиют Богу: Аллилуиа.
Икос 8
Весь был еси сосуд избран Божия благодати, великий Иоанне, на тебе исполнися Крестителя слово, яко не в меру Бог дает Духа. Киими благодатными дарованьми не увенча тя Бог? Киими явленьми благодати не исполнено бысть твое житие? Темже на тя взирающе, приносим ти похвалы сия наша:
Радуйся, дар смирения Христова стяжавый; радуйся, слез и умиления благодать снискавый.
Радуйся, чистотою и целомудрием от Бога украшенный; радуйся, верою чудодейственною озаренный.
Радуйся, не токмо Христу веровавый, но и страдания за Него понесый; радуйся, даром ревности по Бозе увенчанный.
Радуйся, любве к ближним исполненный; радуйся, даром Божественнаго ведения сподобленный.
Радуйся, даром прозорливства просиявый; радуйся, дарование молитвы непрестающия имый.
Радуйся, до конца надежду будущаго блаженства сохранивый; радуйся, блаженство сие еще в жизни сей предвкусивый.
Радуйся, преподобне Иоанне, Рыльский чудотворче, славо и радосте наша.
Кондак 9
Всякое дарование Духа Святаго восприимшу ти, преподобне Иоанне, достиже вещание твое благочестиваго царя Петра, иже видети тя вожделев посла к тебе девять мужей. Ты же алчных их быти духом разумев, малым хлебом напитал еси, иже преславное чудо сие видевше, вопияху Богу: Аллилуиа.
Икос 9
Ветии мира сего не разумеют, како царь Петр, сый во славе своей, к тебе с дары устремися, блаженне, и зело опечалися, не возмогий стремнин ради горных ко святыни твоей приблизитися: но мы, словеса Господа поминающе, ко всем людем реченная, «ищите прежде царствия Божия и правды Его», вопием ти:
Радуйся, яко Царство Небесное на земли достигл еси; радуйся, Царство бо сие, пришедшее в силе, яви ти Господь.
Радуйся, яко Царство Божие в стяжании благодати людем явил еси; радуйся, во плоти бо сый блаженство райское в себе таил еси.
Радуйся, яко бисер многоценный стяжав, суету благ временных показал еси; радуйся, яко правду и мир и радость о Дусе Святе имел еси.
Радуйся, сиянием бо благодати славу царскую затмил еси; радуйся, яко сокровище небесное имый, даров царских не приял еси.
Радуйся, яко зрети друг друга в небесном царствии царю Петру обещал еси; радуйся, яко царя в Писании твоем милосерда и Церкви послушна быти увещал еси.
Радуйся, яко покаянию царя научил еси; радуйся, яко покаяния ради царство вечное ему предрекл еси.
Радуйся, преподобне Иоанне, Рыльский чудотворче, славо и радосте наша.
Кондак 10
Спасти хотя себе до конца от козней вражиих, преподобне Иоанне, пребыл еси в подвизе стояния на камени седмь лет и четыре месяцы. Мнози же поревновавше тебе, близ камене твоего церковь создаша и обитель составиша, начальника тя перваго и пастыря имуще, да возсылается оттуду присно хвалебная Богу песнь: Аллилуиа.
Икос 10
Стена непреоборима бысть ти смирение твое даже до смерти, блаженне Иоанне; разумев бо время отшествия твоего, моление слезное Богу вознесл еси, глаголя: «Отче Вседержителю, ничтоже на земли благо сотворих! Сего ради молю Тя повелети Ангелу благу прийти, да не возбранен ми будет восход от духов лукавствия! Господи, в руце Твои предаю дух мой!» И сия рек, абие дух испустил еси. Мы же, сицевому праведному преставлению дивящеся, тако тя ублажаем:
Радуйся, житием и исходом твоим нас поучаяй; радуйся, горняя мудрствовати, а не земная нас призываяй.
Радуйся, никиимже сластем мирским себе приобщивый; радуйся, блаженную кончину от Бога приемый.
Радуйся, о смерти присно в животе своем помышлявый; радуйся, словеса апостола «по вся дни умираю» исполнивый.
Радуйся, со апостолом Павлом смерти вожделевый; радуйся, разрешитися и со Христом быти присно желание имевый.
Радуйся, слезами и молитвами себе к смерти уготовавый; радуйся, сего ради от смерти не на суд, но в живот пришедый.
Радуйся, вечней радости со Христом по смерти приобщивыйся; радуйся, дерзновение велие пред Богом стяжавый.
Радуйся, преподобне Иоанне, Рыльский чудотворче, славо и радосте наша.
Кондак 11
Пением молебным ублажати тя наставшу времени, благовоние нача от гроба твоего источатися, преподобне Иоанне. Сего ради гроб твой отверзоша и тело твое обретоша нетленно и благоухания исполнено. Оттоле многая чудеса совершахуся от мощей твоих во исцеление к тебе прибегающих и Богу вопиющих: Аллилуиа.
Икос 11
Светоприемную свещу яви тя Господь, преподобне, и храм Духа Святаго, тело же твое тлению непричастно соблюде. Взирающи убо на благодать сию, прославляем тя сице:
Радуйся, нетлением твоим всемогущество Божие благовествуяй; радуйся, безсмертие телес последи общаго воскресения предобразуяй.
Радуйся, нетлением твоим славу Божию в Церкви явивый; радуйся, истину воскресения мертвых утвердивый.
Радуйся, по смерти игумену обители Рыльския во сне явивыйся; радуйся, твоя мощи в Средец град пренести повелевый.
Радуйся, дивная чудеса и зде сотворивый; радуйся, в град Тернов пренесен велия знамения соделавый.
Радуйся, от мощей твоих во градех стольных благодать пролиявый; радуйся, и в пленении быв силами всех ужасивый.
Радуйся, Мануилу царю греческому исцеление даровавый; радуйся, епископу Остригомскому язык связавый и разверзавый.
Радуйся, преподобне Иоанне, Рыльский чудотворче, славо и радосте наша.
Кондак 12
Благодать велию дарова ти Господь за многую любовь, предивный угодниче Божий, преподобне отче наш Иоанне, недуги исцеляти, заблуждшия просвещати и всем просящим быти во спасение. Темже благодаряще Господа, нам тебе даровавшаго, присно зовем ему: Аллилуиа.
Икос 12
Поюще тебе песнь недоумеем, како вся дивная деяния твоя словесы немощными изобразити, преподобне! Зряще же тя велика в угодницех Божиих, дерзаем сице восхвалити тя, зовуще:
Радуйся, в подвизех и трудех предивный; радуйся, прославленным тобою Богом прославленный.
Радуйся, далече вне Церкве Болгарския просиявый; радуйся, и иными Православными Церквами чтимый.
Радуйся, нетленною десницею в Церкви Российстей обитаяй; радуйся, благодатию великих отцев Церкве блистаяй.
Радуйся, подвиги преподобных Антония и Макария явивый; радуйся, деяния светил российских Сергия и Серафима предизобразивый.
Радуйся, от краля унгарскаго прославленный; радуйся, и от турских султанов почтенный.
Радуйся, во обители Рыльстей верными и неверными доселе почитаемый; радуйся, велиих ради чудес твоих от всех прославляемый.
Радуйся, преподобне Иоанне, Рыльский чудотворче, славо и радосте наша.
Кондак 13
О, великий Иоанне, Рыльский чудотворче! Приими сию малую похвалу нашу и молися за ны ко Господу, да ниспослет нам милость Свою и покаянию истинному научит нас, избавит же нас от власти миродержителей тьмы века сего и сохранит в православней вере же и благодатном жительстве под дивным покровом Божия Матере, да спасеннии твоим ходатайством вопием Богу: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангел земный и человек небесный был еси, преподобне Иоанне. Како убо славу твою воспоем достойно, многими немощьми обдержимии? Но сам вложи песнь хвалебную во ycта нас, зовущих:
Радуйся, от родителей благочестивых рожденный; радуйся, ими в страсе Божии добре воспитанный.
Радуйся, из младенства от Церкве николиже отступивый; радуйся, тоя священными ученьми благодатный разум стяжавый.
Радуйся, заповедей Господних блюстителю верный; радуйся, пощений и бдений непрестанных делателю усердный.
Радуйся, по смерти родителей наследие свое убогим раздавый; радуйся, жития ради добраго гонение от человеков лукавых подъявый.
Радуйся, клеветы неправедныя претерпевый; радуйся, досаждения с кротостию понесый.
Радуйся, любовию Серафимскою вслед Христа последовавый; радуйся, ея ради путь узкий иночества избравый.
Радуйся, преподобне Иоанне, Рыльский чудотворче, славо и радосте наша.
Кондак 1
Избранный Богом и предивный житием, преподобне Иоанне, от юности Христа возлюбив, путем тесным к Нему шествовал еси; велиих же ради подвигов твоих и слез излияний дарованьми Духа Святаго обогатился еси. Темже яко велие ко Святей Троице дерзновение имуща ублажаем тя, просяще: от всяких нас бед свободи, зовущих: радуйся, преподобне Иоанне, Рыльский чудотворче, славо и радосте наша.
Молитва к преподобному Иоанну, Рыльскому чудотворцу и пустынножителю
О, великий и предивный чудотворче, преподобне Иоанне, приими моление наше и не отвратися от нас, к твоему заступлению прибегающих: никогдаже бо отвращался еси от приходивших к тебе с печальми своими во дни земнаго твоего жития; вемы же, коликая знамения милосердия являл еси и по преставлении твоем людем православным! Услыши и нас ныне, велиими скорбьми обдержимых, нашедшими на ны в лукавыя дни сия, егда диавол чрез пагубныя козни своя тщится попрати Церковь Святую, лишити же нас спасения вечнаго и благ временныя жизни! Испроси нам у Господа Иисуса Христа прощения грехов, а наипаче греха непослушания Матери нашей Церкви! Даруй нам сокрушение сердца, во еже со умилением неуклонно приступати ко святому Таинству Покаяния, яко да не во осуждение и погибель будет нам причащение Тела и Крове Христовых, но во здравие и спасение. Отжени от нас дух братоненавидения, даруй нам дух любве и мира к братскому единению всех людей твоих! Соедини всех нас любовию ко Христу и Его Церкве Православней, яко да соблюдающе спасительную волю Его, истинная чада Божия будем! Буди нам путевождь во вся дни наша, яко да присно в благодати Духа Святаго суще в чистоте веру содержим и волю Господню до самыя смерти сотворим! В час же кончины нашея явися нам представити души наша к престолу Божественнаго Судии и рещи Ему: «Се аз и дети моя», яко да твоим заступлением вечных мук избавльшеся, неизреченное блаженство Небеснаго Царствия Христова наследим купно с тобою и всеми святыми во веки веков. Аминь.
Азбука
Просмотрено (7) раз
