Гóсподи Иисýсе Христé, Бóже наш, Начáльнейший Врачý душ и телéс, нас рáди вочеловéчивыйся, да исцелúши всегó погибáющего человéка, не презрéвый неисцéльно болящих дéсять прокажéнных, но спасúтельною благодáтию Твоéю очúстивый их, пришéдый яко Богочеловéк во дни земнáго жития Твоегó, благодéтельствуя и исцеляя всех болящих и зле стрáждущих, благосотворúвый и возстáвивый здрáвы разслáбленныя, слепыя, тяжко согрешúвшия, бесáми и страстьмú одержúмыя, во плóти же или умóм, благоприятно приимú молúтву нáшу и проженú сúлою Твоéю губúтельный вúрус, óбраз корóны носящий, и вызывáющий страх и смерть у недýжных и невúнно стрáждущих. Аще и грех рáди мнóгих нáших попустúл есú искушéние сие, мóлим Тя, яко мúлостив, да отъúмеши сие от нас и от всея вселéнныя.
Аще же рáди испытáния вéры нашéствие егó домостроúтельствовал есú, утúши смятéние стрáждущих от губúтельнаго повéтрия сегó. Аще же от злодéйства сопротúвнаго или по небрежéнию неразýмных людéй вúрус сей распрострéся, укротú сúлу егó, яко Бог Всемогýщий. Защитú юныя и болящия сохранú, и в стáрости сýщия от зловрéднаго вúруса исцелú, и вся от стеснéния сéрдца свободú, и вмéсто сегó дáруй нам здрáвие, ослáбу и утешéние, молúтвами Госпожú Богорóдицы и всех Твоúх святых. Аминь.
Источник: www.ekklisiaonline.gr
@Перевод «Трость Скорописца», 2021 г
Просмотрено (63) раз
